Riyaale oo dawlada maraykanka ku tilmaamay cadowga Somaliland, shir jaraa’id

Source: Golisnews.com

2010-01-20

Madaxweynaha Jamhuuriyadda Somaliland Daahir Riyaale Kaahin ayaa shir jaraa’id oo uu Shalay ku qabtay xafiiskiisa qasriga madaxtooyadda wuxuu si ba’an ugu weeraray, dawlda maraykanka oo uu ku sifeeyey cadawga somaliland oo aan mudnayn in la gacan qaado iyo Guddoomiyaha Xisbiga Kulmiye Axmed Siilaanyo oo uu ku tilmaamay nin Federaal aaminsana balse ay shacabka Somaliland ka diideen.

Riyaale oo beryahan ka cadhaysnaa sidii warbaahintu u qaadaadhigtay Booqashada Taariikhiga ah ee Gudoomiyaha Xisbiga Kulmiye ku tegay maraykanka iyo sida Dadka Reer somaliland u soo dhoweeyeen oo ay u weheliso , kalsooni daro uu ka qaaday shacabkii somaliland oo beryahan xukuumadiisa dhabarka u jeediyey sababo badan dartood.

Madaxweyne Rayaale wuxuu sidoo kale iska fogeeyey inay xukuumadiisu gacanta kula jirto khilaafka golaha guurtida wuxuuna ku tilmaamay mid aanay waxba ka jirin isagoo dhinaca kalana usoo jeediyey shir guddoonka golaha guurtidu inay isku yimaadan oo heshiisiiyaan mudanayaasha kale.

Madaxweyne Rayaale oo wajigiisa cadho badani ka muuqatay marka uu shirkani jaraa’id akhrinaayey ayaa wuxuu sidoo kale iska fogeeyey eedaymaha la xidhiidhinaaya xukuumadiisu inay ka danbaysay falalka lagu tuhmaayey argagixisada ee todobaadyadii ugu danbeeyey ka dhacaayey dalka isla markaana wuxuu ka hadlay dilalkii ka dhacay magaalada Laascanood ee gobolka Sool.

ugu horayn Madaxweyne Rayaale wuxuu ka hadlay nabadgelyada Somaliland “waxaa meelaha lagaga sheekeeya xukuumadda ka danbaysay qaraxyadii Somaliland ka dhacay, wixii xunba xaawa leh, waar xukuumaddu siday uga danbaysay, waxaan leeyahay xukuumaddu inay ka hortagto oo baadho mooyaane halkay usoo martay, waa waxaanan qaadan karin taasi, waxaananu u aragna inaanay ahayn xukuumad nacayb eh ay hadda noqotay qarran burburin” ayuu yidhi Madaxweyne Rayaale.

Madaxweynaha Rayaale wuxuu sidoo kale ka hadlay khilaafka golaha guurtida Somaliland isagoo iska fogeeyey inay xukuumadiisu wax gacan ah ku leedahay “xukuumadda ka danbaysa ayaa leeyahay wax kasta haddii xita laba digaag ahi suuqa isku qabsadaan, waar xukuumaddu wax alla waxay ka danbaysa ma jirto, xukuumaddu waxay rabta inuu dalkani nabad ahaado, gole kastaana inuu si sharciya hawshiisa u guto, guurtidana fara gelina kuma hayno, baaqan u jeedinayaana waxaa weeyi shir guddoonku horta inay isku yimaadaan golahoodana heshiisiyaan intaasi oo qudha ayaa loo baahanyahay, suuqa inta la wareego inaan waxaan loo baahnayna laga sheego maahin, wax dhaqanka ku jirana maahin” ayuu yidhi Madaxweyne Rayaale.

Madaxweynaha Somaliland Daahir Rayaale Kaahin isagoo ka hadlaya eedaynta ay xisbiyada mucaaridku ku eedeeyaan xukuumadiisa inaanay doorashada diyaar u ahayn wuxuu yidhi “nimanka mucaaridka ah waxaan maqla iyagoo meelaha ka leh doorashadii ayey xukuumaddu hortaagantahay, waar miyaan wax la isku fallayn, sawtii dhamaatay ee aynu heshiis wada gallay ee aynu gacmaha isku qaadnay, wax alla iyo waxaanu hortaaganahay ma jirto, koomiishan ayaa loo saaray iyaga kaw ahaa kuwii shallay lahaa koomiishanka ha la bedelo toodii ayaanu u raacnay maantana waxay tororogta la hayaan waa hadalo aan qiimo siyaasadeed oo ay ku fadhiyin jirin, waar xaggay xukuumaddu doorashada ku hortaagantahay, yaan ummadda la jahawareerin, ninka dalkani doonaya inuu madaxweyne ka noqdow waddo loo soo maro ayey leedahay” ayuu yidhi Madaxweyne Rayaale.

Madaxweyne Rayaale wuxuu si badheedh ah ugu eedeeyey Guddoomiyaha xisbiga Kulmiye inuu yahay nin aaminsan federaalnimada isla markaana uu ka soo horjeedo qaddiyada madax banaanida Somaliland isagoo taasi ka hadlayana wuxuu yidhi “anigu markaan dalka dibadiisu u baxo dadka reer Somaliland ee aan la kulmo waxaan u sheega inay midoobaan, nimanka mucaaridka horkacaya ee uu Axmed Siilaanyo ka mid yahay waad arkaysaan sida ay dadkii u kala qaybinayaan, weliba niman aan dadlkani jeclayn oo Somaliland ku riixaayey inay federaalnimo la gasho Soomaaliya ayuu Siilaanyo maraykan kula kulmay, dhawaan mar aan dhegaysanaayeyna wuxuu afkiisa ka qirtay inuu ka mid ahaa raggii federaalnimada aaminsana ee ku taami jiray balse shacabka Somaliland ay hor istaageen oo meel uu u dhaafo waayey, Axmedow waxaan ku leeyahay dalkani kuugu dooran maayo madaxweyne inaad cadawgooda gacan qaado, wixii aad ku riyoon jirtayna aad niyadaada ku hayso” ayuu yidhi Madaxweyne Rayaale.

Madaxweynaha oo ay cadho badan ka muuqatay wajigiisa wuxuu si ba’an u weeraray warbaahinta madaxa banaan gaar ahaana wergeysyada ka soo baxa caasimadda Hargeysa isagoo sheegay inu gebi ahaanba joojiyey akhriskii wergeysyada “waxaan u sheegaya nimanka wergeysyada qora inaan joojiyey akhriskiinii, waxaan cay iyo aflagaado iyo si xun wax u sheeg ahayn oo ay qoraan ma jirto, ma akhriyo mana akhriyo doono” ayuu yidhi Madaxweyne Rayaale.

Madaxweynaha ayaa gebo gebadii shirkiisani jaraa’id oo ay hareero taagnayeen wasiiradiisa madaxtooyada iyo arrimaha gudahu wuxuu ka dhaqaaqay goobtii uu shirka jaraa’id ku qabanaayey isagoo gebi ahaanba diiday in wax su’aal ah la weydiiyo “wax su’aal ah oo aan ka jawaabayo ma jirto” ayuu yidhi Rayaale isagoo dhinaca xafiiskiisa usii socda.

Shirkani jaraa’id ee Madaxweyne Rayaale ayaa ahaa kii uu ugu cadho badna isagoo mararka qaarkoodna hadaladu ay kaga dhex qasmayeen cadhada haysay awgeed, wuxuu si ba’an u weeraray warbaahinta, guddoomiyaha xisbiga Kulmiye iyo kooxo uu ku tilmaamay inay yahiin qaswadayaal.

Leave your comments below (you can use your Facebook account, click the "from" field)