Guurtida Oo kulan Cafis iyo Laab-xaadhsho ah Madal Il-yartu Is Qabtay Isku Soo Hor Fadhiistay

Hargeysa (Waryatv.com), Gudoomiye ku xigeenka koowaad ee golaha guurtida Somaliland Sh Axmed Sh Nuux Fureh yaa maanta waxa uu qado casuumada u sameeyey mudanayaasha golaha guurtida, taas oo uu sheegay in uu uga dan-lahaa inay mudanayaasha iyo shirgudoonkuba isku samaaxaan isla markaana ay is cafiyaan.

Xafladii qado sharafta ee maanta oo lagu qabtay hotel Xaraf ee magaalada Hargeysa, ayaa waxaa ka soo qayb galay gudoomiyaha golaha guurtida Saleebaan Maxamuud Aadan, Gudoomiye ku xigeena koowaad ee golaha Sh Axmed Sh Nuux Fureh oo ahaa masuulka fidiyey qado sharafta ay isugu yimaadeen dhamaan mudanayaasha golaha guurtida iyo shaqaalahooduba, Gudoomiye ku xigeenka labaad ee guuritda Siciid Jaamac Cali iyo xoghayaha guud Cabdilaahi Dheere.

 Qado sharaftaas kadib waxaa hadal yar oo kooban soo jeediyey Gudoomiye ku xigeenka koowaad  Sh Axmed oo sheegay in uu casuumadan qadada ah uga dan-lahaa inay umadu aragto golihii guurtida oo miis kaliya wax ku wada cunaya, isaga oo arintaas ka hadlayana waxa uu yidhi

“Hadal badani maanta ma jiro ee waxaanu golaha isugu yeedhanay waa tii baryahanba dadku inagu sheekaysanayey ee ha-la-yidhaahdo maanta nimankii wax-bay wada cunayaan oo nimanku sidii aynu moodaynayba maaha ujeedaduna sidaas ayey ahayd, goluhuna ha isa saamaxo, wixii hawl ah waxaynu ku dhamaysan doonaa golaheenii”.

Intaasi kadib waxaa isaguna halkaasi ka hadlay Gudoomiyaha golaha guurtida Saleebaan Maxamuud Aadan, waxaanu u mahad naq balaadhan u jeediyey gudoomiye ku xigeenkiisa, kaas oo uu sheegay in illaahay ka abaal mariyo casuumada uu u fidiyey mudaayaasha golaha guurtida, waxaan uu yidhi

“Guddoomiye hadli-maayo oo maanta waxaa iska leh Guddoomiye ku xigeenka sidaas uu sheegayna hadii uu yidhi malaha waxaad ilawdeen inaynu isku sumad iyo isku codnahay waad ilawdeen, wixii hawla-heena kale ahna waxaynu ku naaqishi doonaa golaheenii, waanu mahad sanyahay Guddoomiye ku xigeenku hadiiba uu calool wax galiyey”.

Waxaa iyaguna casumadaasi hadlo duco iyo saamaxaad isugu jirta ka soo jeediyey Xildhibaan Cabdilaahi Ibraahim Xirsi (Dhugad) oo ahaa Guddoomiyihii hore ee guddiga joogtada ah, isla markaana uu khilaafa weyni ka dhashay wax-ka badalkii lagu sameeyey iyo Xaaji Cabdikarin Xuseen (Cabdi Waraabe), oo isna halkaasi hadalo duco ah ka soo jeediyey kuna soo khatimay.

Tan iyo intii uu khilaafka weyni soo dhex galay golaha guurtida waa markii koowaad ee ay isugu yimaadaan kulan balaadhan oo ay ujeedadiisu tahay inay isku saamaxaan isla markaaa wixii khilaaf ah ay halkaas ku dhamaadaan, taas oo ay sheegeen inay uga gudbayaan hawlihii qaranka ee loo igmaday.

Xafiiska wararka ee Waryatv

Hargeysa/Somaliland

Reported by Abdiqani Abdilahi Ahmed

(Asporo)

Asporo4live@hotmail.com