Guddoomiye Ku Xigeenka Golaha Wakiilada Somaliland Oo Ka Warbixiyey Shirkii Waddamada Barwaaqo Sooranka Oo Uu Ka Qayb-Galay

 Hargaysa (Waryatv.com)-Guddoomiye ku xigeenka 1aad ee Golaha wakiilada Somaliland Cabdicasiis Maxamed Samaale ayaa fadhigii maanta ee Golahaas ka jeediyey warbixin uu sharaxaad kaga bixinaayey shirweynihii waddamada Barwaaqo sooranka oo lagu qabtay magaalada London ee caasimada cariga Ingiriiska, kaas oo uu sheegay in Somaliland si rasmi ah loogu casuumay.

Guddoomiye ku xigeenka 1aad ee Golaha wakiilada oo maanta qoraal ka soo saaray nuxurka shirkaasi xambaarsanaa ayaa sheegay in shirkaas lagu lafo guray noocyada nabadgalyada iyo waxyaabaha kor u qaada, taas oo ay tibaaxeen in hadii dal uu hadheeyo musuqmaasuq, cadaalad xumo iyo horumar la’aan aanay wax nabadgalyo ahi ka suurtoobi Karin, hase yeeshee qoraalka uu Guddoomiye ku xigeenku soo saaray oo nuqul ka mid ahi soo gaadhay Shabakada wararka ee WARYATV.COM waxa lagu bilaabay sidan:  "Waxa si rasmi ah loogu martiqaaday Golaha Wakiillada Somaliland shirweynihii Waddamada Barwaaqa-sooranka (CPA). Shirkaa waxa ka soo qaybgalay 44 afar iyo afartan dal Madaxdooda, Guddoomiyayaasha Baarlamaannadooda iyo xubno kale, Ergooyinku waxay ka koobnaayeen sagaashameeyo Mudane, dal walbana ugu yaraan laba xubnood ayaa ka socday. Baarlamaanka Somaliland wuxu si rasmi ah uga mid ahaa Ergooyinkaa halka magaca Somalilandna uu ku qornaa waraaqaha  rasmiga ah ee Ergooyinka iyo waddamada shirka ka soo qaybgalay.

Shirku wuxuu furmay 31 January 2009, waxaanu ka furmay xarunta Baarlamaanka Wadanka Ingiriiska Westminster London, waxaana furay Afhayeenka Baarlamaana Ingiriiska,  John Berco. Afar maalmood ayuu shirku ka socday Magaalada London halka saddex maalmoodna uu shirku ka socday Magaalada Belfast ee Gobolka Northern Ireland.

Halkaas oo uu martida Weftiga  ah ku soo dhaweeyey Afhayeenka Baarlamaanka Gobolka Northern Ireland Mr. William Hay MLA. halkaas  oo shirka lagu soo gebagabeey. Shirka waxa lagaga hadlayey doorka Baarlamaanadu ku leeyihiin dhisidda iyo adkaynta nabadgalyada.

Waxa si weyn shirka loogu lafaguray nabadgalyada iyo waxa dhisa ama dumiya, nabadgalyo in aan la´aanteed nololi jirayn.

- Nabadgalyo Caddaalad la´aanteed iin ayna jirayn.

- Nabadgalyo horumar la´aantii in aanay jirayn.

- Nabadgalyo nolosha dadka oo kor loo qaado la´aanteed inaanay jireyn.

- Nabadgalyo Saxaafad madaxbannaan la´aanteed inaanay jireyn.

- Nabadgalyo waddan musuqmaasuq hadheeyey in aanay ka jirayn.

waxa kale oo shirkaa lagaga hadlay noocyada  nabadgalyo sida nabadgalyo togan iyo nabadgalyo taban ama nabadgalyo aan lug adag ku taagnayn oo xilli kasta dumi karta. waxa shirka si weyn loogaga hadlay doork,a baarlmaanku ka qaadan karo toosinta maamulka iyo in uu yahay ka xukuumad dheeli tiri kara. in laga rabo inuu toosiyo Xukuumadaha oo uu ku dabagalo shaqada, maadaama oo uu matalayo shacbigii soo doortay in uu ka turjumo baahida shacbiga.

Intii shirku socday waxa noo suurta gashay in aannu la kulanno Madax badan oo shirka ka soo qaybgashay oo aannu kala hadalnay arrimaha Somaliland. Madaxdaa waxa ka mid ahaa Afhayeenka Baarlamaanka Ingiriiska oo hadalladiisii ay ka mid ahaayeen. "Casuumadda Baarlamaankiinna Somaliland, Anigaa u fidiyey, waxay ka dhigan tahay aqoonsi  waanad heli doontaan aqoonsi rasmi ah, haddii aad la timaadaan dadaalka la idiinka baahanyahay. Madaxda kale ee shirkaa ka soo qaybgalay waxa ka mid ahaa Madax fara badan oo waddamo kala duwan oo ka socday. gebagabadii shirkaasna waxa laga soo saaray War-murtiyeed ka koobnaa shan qodob."

Hargaysa/Somaliland

Cabdiqani Cabdilaahi Axmed

Asporo@waryatv.com