Wmiasiirka Diinta iyo Awqaafta Oo Dalbaday In Wargayska Haatuf La Hor Geeyo Sharciga.

Hargeysa (Waryatv.com), Wasiirka diinta iyo awqaafta Somaliland oo shalay qabtay shir jaraa’id ayaa si kulul u dhaleeceeyey war uu ka qoray wargeyska haatuf, kaas oo sheegaayey in masaajid uu goob joog ka ahaa wasiirku lagu soo hadal qaaday kalmado lagu taageeraayo kooxda Al-shabaab ee ka bar bar dagaalanta dawlada ku meel gaadhaka ah ee somaliya.

Wasiirka ayaa hay’adaha aminga ka codsaday in sidga ugu haboon talaabo laga qaado wargayska haatuf, wasiirka ayaa sidoo kale sheegay in aanu war-kaasi sal iyo raadtona lahayn, waxaanu sheegay in wargayska looga fadhiyo cadynta warkaas.

Sidoo kale 15 August wargayska haatuf ayaa wasiirka diinta iyo awqaafta ku sheegay in uu dalka ka wado khilaaf diineed, kaas oo hor seedi karta sida uu sheegay wargaysku iska hor’imaad diineed.

Wasiirka ayaa arrintaas in badan beeniyey, mar aanu waraysi la yeelanay wasiirka oo aanu wax ka weydiinay khilaafka diineed waxa uu noo sheegay in aanay arrintaasi waxba ka jirin, balse uu jiro sida uu sheegay wasiirku barnaamij uu joojiyo, kaas oo uu ku jiray qalad ku lidi ah dhanka diinta.

Ilaa hada maamulka wargayska haatuf kama hadal arrinta soo kala dhex gashay iyaga (Haatuf) iyo wasiirka diinta iyo awqaafta, mana jiraan warar raali galin ah oo ay ka bixiyeen arrimahaas wargays ahaan.

Xafiiska wararka Ee Waryatv

Hargeysa/Somaliland

Reported by

Qaasm