Gen Maxamed Saqadhi Dubad Oo Xilkii Wareejiyey

 Hargeysa (Waryatv.com), Taliyhii ciidanka booliska Somaliland Geg:- Maxamed Saqadhi Dubad ayaa maanta si rasmi ah xilkii u wareejiyey, kadib markii uu madaxweynaha Somaliland dhawaan magacaabay taliye cusub.

Xaflada xil wareejinta ayaa ka dhacday xarunta taliska booliska Somaliland, waxaana ka soo qayb galay masuuliyiin kala duwan oo ka socday, xukumada, hayadaha madaxabanaan iyo marti sharaf kale.

Ugu horayn waxaa halkaas ka hadlay taliyihii hore ee ciidanka booliska Gen Maxamed Saqadhi Dubad, waxaanu ka faalooday marxaladihii kala duwanaa ee uu la soo maray booliska tan iyo markii xilka loo magacaabay.

Gen dubad ayaa in badan waxa uu mahad celiyey ciidanka booliska Somaliland oo uu sheegay inay si mug leh uga qayb qaateen hawlaha nabad galyada Somaliland, waxaanu ku bogaadiyey sida asluubta leh ee ay u la shaqeeyeen xiligii uu xilka hayey.

Geesta kale waxaa isna halkaas ka hadlay taliyaha cusub ee ciidanka booliska Somaliland Cilmi Rooble (Cilmi Kabaal), waxaanu sheegay in uu halkaas ka sii wadi dooni hawlaha booliska Somaliland.

Cilmi Kabaal ayaa waxa uu ciidanka booliska ka codsaday in ay si hufan ula shaqeeyaan, waxaanu ku bogaadiyey taliyihii hore halka uu soo gaadhsiiyey ciidanka booliska mudadii uu xilka hayey.

Xafiiska Wararka Ee Waryatv

Hargeysa/Somaliland

Reported by

Ibraahim Abdirahman Qaasim

ibrahimqasim@waryatv.com

Qaasim