Madaxweyne Siilaanyo Oo Ku Dhawaaqay Maalinta Caafimaadka Qaranka

Hargeysa (Waryatv.com), Madaxweynaha Somaliland Md Axmed Maxamed Maxamuud Siilaanyo ayaa maanta soo saaray maalin u gaara caafimaadka, taas oo uu madaxweynuhu ugu magac daray maalinta ololaha caafimaadka qaranka.

Waxa sidaas uu ku sheegay madaxweynuhu shir jaraa’id oo uu maanta ku qabtay gurigiisa, waxaana shiraaski ku wehelinaayey,  madaxweyne ku xigeenkiisa, wasiirka arrimaha gudaha, wasiirka warfaafinta iyo afhayeenka madaxtooyada Somaliland.

Maalinta caafimaadka loo asteeyey qaranka Somaliland waxay ka dhaqan galaysaa sida uu sheegay madaxweynuhu maalinta axad ee fooda inagu soo haysaa, taas oo ku beegan shanta bisha sagaalaad.

Maalintan ayaa noqon doonta maalin laga hir geliyo guud ahaan gobolada dalka oodhan, waxaanay sida uu sheegay madaxwyenuhu wax ka tari doontaa xaalada caafimaad ee Somaliland.

Madaxweynaha ayaa intaas ku daray in maalintaasi ay noqon doonto mid joogto ah, taas oo 45-kii maalmoodba laga bilaabi doono gobolada iyo degmooyinka dalka oodhan ololaha caafimaad qaranka.

Waa markii ugu horsay ee madaxweyne Axmed Maxamed Maxamuud Siilaanyo, ka hadlo xaalada caafimaad ee magaalada Hargeysa iyo gobolada, tan iyo markii uu la wareegay hogaanka dalka.

Magaalada Hargeysa iyo meelo badan oo ka mida Somaliland waxaa toosan marka aad u fiirsato qashin baahsan, kaas oo xaalada caafimaad daro abuuri kari xiliga ay da’aan roobabku.

Hargeysa/Somaliland

Reported by

Ibraahim Abdirahman Qaasim

ibrahimqasim@waryatv.com