Madaxweynaha Somaliland Oo Ka Qayb Qaatay Maalinta Nadaafada Qaranka

Hargeysa (Waryatv.com), Maalinta nadaafada qaranka Somaliland ayaa maanta oo axad ah laga bilaabay meelo badan oo ka tirsan Somaliland, madaxweynaha Somaliland ayaa soo saaray dhaqan galka maalinta nadaafada, waxaana saaka lagu waaberiistay qiiq isku xidhay xaafadaha iyo meelo badan oo ka mida Hargeysa, taas oo ka danbaysay kadib markii la gubay xashiish badan oo laga soo uruuriyey badhtamaha suuqa iyo koonayaasha xaafadaha.

Ugu horayn waxaa hawsha nadaafada saaka aroortii hore bilaaby madaxweyaha Somaliland iyo masuuliyiinta ka dhex muuqata siyaasada Somaliland.

Madaxweynaha waxaa ku wehelinaayey maalinta nadaafada qaranka, xaaskiisa Aamina Waris, masuuliyiinta kulmiye, maamulka dawlada hoose, xubno ka mida golaha wasiirada iyo masuuliyiin kale oo tiro badan.

Sidoo kale madaxweyne Axmed Maxamed Maxamuud Siilaanyo ayaa shaadhka u laabtay sidii uu qashinka magaalada uga guri lahaa, waxaanu qashinka daray majarafada iyo qalabka kale ee loo diyaariyey.

Geesta kale hawsha nadaafada waxaa ka qayb qaatay shirkada is gaadhsiinta ee Telesom oo dhankeeda ka waday nadaafada qaranka, waxaanay ku hawl galeen gaadiidka shirkadu leedahay.

Waa markii ugu horsay ee la arko madaxweynaha Somaliland iyo shacabka oo meel uga soo wada jeestay ilaalinta nadaafada guud ee Somaliland, waana hawl gal aan weli ka dhici Somaliland.

Ugu danbayntii ciidanka ilalaada madaxweynaha ayaa iyaguna si weyn uga qayb qaatay gurida iyo gubida qashinka magalaada hargeysa suuqyadeeda iyo koonayaasha xaafadaha kala duwan.

Waryatv/Hargeysa

ibrahimqasim@waryatv.com