Golaha Guurtida Oo Maanta Ku Kala Aragti Duwanaaday Mudo Kordhinta Doorashooyinka Soo Socda

Hargeysa (Waryatv.com), Fadhi aan caadi ahayn oo ay maanta isugu yimaadeen golaha guurtida Somaliland oo uu hogaaminaayey gudoomiye ku xigeenka kowaad ee golaha guurtida Sh Fure, ayaa ku qabsoomay hoolka hay’ada shaqaalaha ee hargeysa.

Ku simaha gudoomiyaha ayaa mudanayaasha golaha guurtida ujeedada fadhiga maanta ku war galiyey in golaha la soo dhex dhigay warqad ka timi dhanka madaxweynaha, taas oo salka ku haysa sidii mudo kordhin loogu samayn lahaa doorashooyinka, golaha deegaanka iyo baarlamaanka.

Mudanayaasha oo ay tiradoodu kor u dhaafaysay afatameeyo ayaa ka dhiibtay dareeno kala duwan warqada la soo dhex dhigay, waxaanay qaarkood soo jeediyeen in madaxweynuhu ka noqdo mudo kordhinta uu dalbanaayo.

Kulanka ayaa isku bedelay mid xamaasadi ku jirto, waxaana ay xildhibaano badani soo jeediyeen in aan dib loo dhigin doorshooyinka baarlamaanka, balse qaar ayaa iyagu ogolaa in dib loo dhigo doorashada golaha deegaanka.

Ku simaha gudoomiyaha golaha guurtida Sh Fure ayaa ka codsaday mudanayaasha in maalinta bari ah kulan caadiya dib la isugu soo laabto, kulankaas oo ka dhici doona hoolka shirarka ee wasaarada arrimaha guddaha.

Ilaa hada ma cada sababta uu madaxweynaha Somaliland Md Axmed Maxamed Maxamuud Siilaanyo ku codsaday in dib loo dhigo doorashooyinka saddexda gole.

Doorashooyinka Golaha deegaanka ayaa hada ah mid mudo dhaafa, waxaana sidoo kale wakhtigi uu ka sii dhamaanaya labada gole ee guurtida iyo wakiilada.

Isku soo wada duuboo waxaa jiray kulan afar geesood ahaa oo ay mudo ka hor ay wada qaateen madaxweynaha, guurtida, wakiilada iyo ku simaha golaha deegaanka, kaas oo lagu gorfeeyey arrimaha doorashooyinka soo socda, in kastoo aanay jirin qodobo laga soo saaray kulnakaas.

Waryatv/Hargeysa

ibrahimqasim@waryatv.com