Wasiir Gaboose Oo Ka Hadlay Khatarta Dagaalka Deegaanka Galgala

Hargeysa (Waryatv.com), Wasiirka arrimaha gudaha Somaliland Dr Maxamed Cabdi Gaboose, ayaa markii ugu horaysay ka hadlay xaalada amaan ee Somaliland, waxaanu sheegay in dagaalka ka socda Galgala uu khatar ku keeni karo Somaliland, haddii ay xaaladu intaas ka sii qadhaadhaato.

Wasiirka ayaa sheegay in xaalada Somaliland ee nabad galyo uu dagaalkaas ka dhexeeya ciidanka dawlad goboleedka Puntland iyo kooxda mayalka adag ee uu hogaaminaayo Sh Atom uu wiiqo karo Somaliland hadii uu sii xoogaysto.

Wasiir Maxamed Cabdi Gaboose ayaa sidaas ka sheegay kulan ay isku arkeen koox wasiiro ah, kuwaas (Wasiirada) oo ka waramaayey wax-qabadkii intii ay xilka hayeen.

Wasiirada ayaa ka waramay wixii u qabsoomay intii ay joogeen wasaaradaha ay masuulka ka yihiin, waana kulankii ugu horeeyey ee ay yeeshaan xubno wasiiro ah oo ka tirsan xukumada cusub, kulankaas oo ka baxsanaa xayndaabka aqalka madaxtooyada, isla markaana ka dhacay wasaarada war-faafinta Somaliland.

Isku soo wada xooro wasiirka arrimaha gudaha ayaa farta ku goday in laga fiirsado khatar kasta oo ka dhalan karta dagaalada goos gooska ah ee ka socda deegaano ka tirsan Puntland.

Gobolada laga cabsida qabo in uu dagaalku saamaynta ugu weyn ku yeesho waxaa ka mida gobolka Sool deegaano ka tirsan, in kastoo uu ciidanka Somaliland guud ahaan hada ku jiro heegan buuxa.

Hargeysa/Waryatv

ibrahimqasim@waryatv.com